ಇವನೊಲುಮೆಯೆಂದರೆ

• ಲೇಖಕರು
• ಇತ್ತೀಚಿನ ಬರಹಗಳು

ನಂದಿನಿ ಹೆದ್ದುರ್ಗ

ನಂದಿನಿ ವಿಶ್ವನಾಥ ಹೆದ್ದುರ್ಗ ಅವರು ಹಾಸನ ಜಿಲ್ಲೆಯ ಹೆದ್ದುರ್ಗ ದವರು..ಕಾವ್ಯ ಮತ್ತು ಕೃಷಿ ಆಸಕ್ತಿಯ ವಿಷಯಗಳು..ಅಸ್ಮಿತೆ ಮತ್ತು ಒಳಸೆಲೆ ಬಿಡುಗಡೆಯಾದ ಸಂಕಲನಗಳು.ಕತೆ,ಲೇಖನ, ಸಂದರ್ಶನ,ಪ್ರಬಂಧ ಹನಿಗವಿತೆಯಲ್ಲೂ ಆಸಕ್ತಿಯಿದೆ..

ಇತ್ತೀಚಿನ ಬರಹಗಳು: ನಂದಿನಿ ಹೆದ್ದುರ್ಗ (ಎಲ್ಲವನ್ನು ಓದಿ)

• ಕ್ಯಾಮೆರಾ ಮನ್.. - ಡಿಸಂಬರ್ 31, 2021
• ಯುದ್ಧ ಗೆದ್ದ ನಂತರ - ಜುಲೈ 20, 2021
• ಪುಸ್ತಕ ದಿನ ಮತ್ತು ಚೆಕ್ ರೋಲ್ ಸಾಹಿತ್ಯ - ಏಪ್ರಿಲ್ 23, 2021

೧)
‘ಅವನ ಮಾಸಲು ನೆನಪುಗಳನ್ನು
ಹಚ್ಚಿಕೊಂಡಿದ್ದೇನೆ.’
ತಗ್ಗಿದ ಸ್ವರದಲ್ಲಿ ನಾನೆಂದೆ
‘ನಾ ನಿನ್ನ ಪ್ರೀತಿಸುತ್ತೇನೆ’
ಇವನೆಂದ

‘ನಿನ್ನ ಕಣ್ಣಿಗಿಳಿದು ಅವನ
ಹುಡುಕುತ್ತೇನೆ’
ನಾನೆಂದೆ
‘ನಿನ್ನ ಬೆಳಕಿನಲ್ಲಿ
ನಾ ನನ್ನೇ ಕಾಣುತ್ತೇನೆ’
ಇವನೆಂದ

ನಿಟ್ಟುಸಿರಿಟ್ಟು ಮತ್ತೆ
ಏರತೊಡಗಿದೆ ಮೆಟ್ಟಿಲು
ಅಚಾನಕ್ಕು ಅಲ್ಲಿ!
ಆ ಎತ್ತರದಲ್ಲಿ ಅವನಿದ್ದ

ನಾನಿವನ ಬೆರಳು
ಹಿಡಿದು ಸೂರ್ಯಾಸ್ತ
ನೋಡಿದೆ.

–*—*—*–

೨)
ಹಾಗೆ
ಅಂದುಕೊಂಡ​
ಮೊದಲ ದಿನ
ಅದು
ಮಾಮೂಲಿನಂತಿದ್ದೆ

ಮೂರನೇ ದಿನ
ಬರೀ ಹುಃಗುಟ್ಟೆ
ಮನಸ್ಸೆಲ್ಲಿದೆ ಎಂದ
ಆರನೇ ದಿನ
ನಡುನಡುವೆ
ಆಕಳಿಸಿದೆ
ಆರಾಮಿಲ್ಲವೇ ಎಂದ

‘ಚಿನ್ನಾ ಮುದ್ದು ಪುಟ್ಟು’
ಎಂದ
ಸೊಟ್ಟಗೆ ನಕ್ಕೆ
ಆತ್ಮವೆಂದ
ಆಯಾಸವೆಂದೆ
ವಿಧಿಚಿತ್ತವೆಂದ
ವಿಷಯಾಂತರಗೈದೆ

ಹತ್ತನೇ ದಿನಕ್ಕೆ
ರೆಕ್ಕೆ ಬಲಿಯಿತು
ಎಂದೆ

ಏನು ಮಾಡಲಿ ಎಂದ
ಬಿಡುವಿಲ್ಲವೆಂದೆ
ಕಾಯುತ್ತೇನೆ ಎಂದ
ಖಾಲಿ ಮಾಡಿದೆ ಎಂದೆ

ತಿಂಗಳು
ತುಂಬುವಷ್ಟರಲ್ಲಿ
ತಣ್ಣಗಾದ.
ಕಣ್ಣೀರಾದ
ಸಾವರಿಸಿಕೊಂಡ
ಸಂಕಟವ ಹೇಳಿದ
ಸುಳ್ಳಾಡಬೇಡೆಂದ

ಮೆಟ್ಟಿಲುಗಳಲೀಗ
ಹೊಸಹಾಡು ಎಂದೆ
ಕಡಿದ ಬಾಳೆಯಂತಾದ
ಮರೆಯಲಾರೆ ಎಂದ
ಮೀಸಲು ನಿನಗೆಂದ

ಎಲ್ಲಕ್ಕೂ ಇಲ್ಲ
ಎಂದೆ
ನಲ್ಲೆ ಎಂದ
ಒಲ್ಲೆ ಎಂದೆ
ಕೊಂದೆ ಎಂದ
ವೃಥಾ
ಬಂಧವೆಂದೆ

ಅಯ್ಯೋ..
ನನ್ನ ಹುಚ್ಚೇ
ಅವನಿರದ ದಿನಗಳಲಿ
ಖರೆ ನನ್ನಿರುವು
ತಿಳಿಯಬೇಕಿತ್ತು
ಸಾಸಿವೆ ಹೊಲದಲ್ಲಿ
ಸಾಲಕ್ಕೆ ಸಾವು
ಕೇಳಬೇಕಿತ್ತು