ಕಾಸರಗೋಡು ಜಿಲ್ಲೆಯ ಕಾರಡ್ಕ ದಲ್ಲಿ ಜನಿಸಿದ ಕೆ.ವಿ. ತಿರುಮಲೇಶ್ ಕನ್ನಡದ ಮಹತ್ವದ ಬರಹಗಾರ, ಚಿಂತಕ ,ಭಾಷಾಜ್ಞಾನಿ, ಕವಿ, ಕಥೆಗಾರ, ನಾಟಕಕಾರ, ವಿಮರ್ಶಕ. ಸುಮಾರು ಐದು ದಶಕಗಳ ಕಾಲ ಕವಿತೆ, ಕತೆ, ವಿಮರ್ಶೆ, ಅನುವಾದ ಕ್ಷೇತ್ರಗಳಲ್ಲಿ ಕೆಲಸ ಮಾಡಿಕೊಂಡು ಬಂದಿದ್ದಾರೆ. ‘ಮುಖವಾಡಗಳು’ ಹಾಗೂ ‘ವಠಾರ’ ಇವರ ಎರಡು ಜನಪ್ರಿಯ ಕೃತಿಗಳು. ಇವರ ೪೦ ಪ್ರಕಟಿತ ಕೃತಿಗಳಲ್ಲಿ ಅವಧ, ವಠಾರ, ಮುಖವಾಡಗಳು, ಪಾಪಿಯೂ ಎಂಬುವು ಮುಖ್ಯ ಕವನ ಸಂಕಲನಗಳು. ಆರೋಪ, ಮುಸುಗು ಇವರ ಕೆಲ ಕಾದಂಬರಿಗಳು. ಬೇಂದ್ರೆಯವರ ಕಾವ್ಯಶೈಲಿ, ನಮ್ಮ ಕನ್ನಡ, ಅಸ್ತಿತ್ವವಾದ ಇವು ಇವರ ಮುಖ್ಯ ವಿಮರ್ಶಾ ಕೃತಿಗಳು. ಮಾಲ್ಟ ಲೌರಿಡ್ಜ್ ಬ್ರಿಗ್ಗನ ಟಿಪ್ಪಣಿ ಪುಸ್ತಕ ಇವರ ಅನುವಾದಿತ ಕೃತಿ. ಅಕ್ಷಯ ಕಾವ್ಯ ಕೃತಿಗೆ ಪ್ರತಿಷ್ಠಿತ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಬಂದಿದೆ.
ಇತ್ತೀಚಿನ ಬರಹಗಳು: ಡಾ. ಕೆ ವಿ ತಿರುಮಲೇಶ್ (ಎಲ್ಲವನ್ನು ಓದಿ)
- ಅರ್ಧ ವರ್ಷದಲ್ಲಿ ಶಾಲೆಗೆ ಸೇರಿದ ಹುಡುಗ - ಅಕ್ಟೋಬರ್ 30, 2024
- ಒಂದು ಹಲಸಿನ ಹಣ್ಣಿನ ಹಂಬಲ ಮತ್ತು ಇತರ ಪದ್ಯಗಳು - ಅಕ್ಟೋಬರ್ 22, 2022
- ನೈನವೆ - ಮೇ 26, 2022
ಒಬ್ಬರಿಗೊಂದೊಂದು ನೈನವೆ
ಬಹುಶಃ
ನಮಗೂ ನಮ್ಮದೊಂದು ನೈನವೆ
ಸಾವಿರ ವರ್ಷಗಳ ಹಿಂದಕ್ಕೊ
ಮುಂದಕ್ಕೊ
ಸಿನ್ ಸಿಟಿ ನೈನವೆ
ದೇವರು ಶಪಿಸಿದ ಸಿಟಿ
ಎಂದೆಂದಿಗೂ ನೀವು ಹಾಳಾಗಿ ಹೋಗಿ ಎಂದು
ದಿ ಅನ್‍ರೀಯಲ್ ಸಿಟಿ
ಗಲ್ಲಿ ಗಲ್ಲಿಯ ಹೊಕ್ಕು ನೋಡಿದರೆ ದಾರಿ ತಪ್ಪಿ ಕೆಲವು
ಬೇಕೆಂದೆ ಹಲವು
ಎರಡರ ಮಧ್ಯೆ ದಾರಿ
ಗೊತ್ತಾಗದೆ ಎಲ್ಲವು ಏನಾದರೊಂದನ್ನು
ಅಪ್ಪಿ ಇದು ಮನುಷ್ಯಾವಸ್ಥೆಯೆಂದು
ಚಿನಿವಾರಕಟ್ಟೆಯಲಿ ಚಿನಿವಾರ
ಎತ್ತಿ ಹಿಡಿದ ಸುತ್ತಿಗೆ ಹಾಗೇ ಇದೆ
ನೇಕಾರ ಬೀದಿಯಲಿ ಮಗ್ಗ ನೇಯುತ್ತ
ಲಾಳ ಅರ್ಧಕ್ಕೆ ನಿಂತಿದೆ
ತುರುಫ್ ಎಸೆಯಲು ಚೀಟಿಯೆತ್ತಿದ
ಇಸ್ಪೀಟಾಟಗಾರ
ಎಸೆಯದೇ ಇದ್ದಾನೆ
ಬಯಲಲ್ಲಿ ಮಕ್ಕಳೇ ಇಲ್ಲ
ನರ್ತನಶಾಲೆಯಲ್ಲಿ ಮೇಲೇರಿದ
ನರ್ತಕಿಯ ಲಂಗ ಕೆಳಗಿಳಿಯುವುದೆ
ಇಲ್ಲ
ಬೆರಗಾಗಿ ನೋಡುತ್ತ ನಿಂತವರು ಈಗ
ಸ್ಟಾಚ್ಯೂಸ್
ಎಲ್ಲವೂ ಸ್ಗಬ್ದ ಚಲನೆಯೇ ಇಲ್ಲ
ಯುಗ ನಿಂತಿತೇ ಇದು
ಅಂತ್ಯವೇ
ಅಷ್ಟಕ್ಕೂ ಇವರೇನು ಮಾಡಿದರು
ನಾವು ಮಾಡದ ಪಾಪ ದೇವರೇ
ನಿನ್ನ ಧಿಕ್ಕರಿಸಿದರು
ನಾವಾದರೆ ನಿನ್ನ ಇರವನ್ನೆ ತಿರಸ್ಕರಿಸಿದೆವು
ನಿರಂತರ ಚಲನೆಯಲ್ಲಿ ಬಿದ್ದೆವು
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ