ಪತ್ತಂಗಿ ಎಸ್ ಮುರಳಿ ಆಯ್ದ ೧೦ ಚುಟುಕುಗಳು

• ಲೇಖಕರು
• ಇತ್ತೀಚಿನ ಬರಹಗಳು

ಪತ್ತಂಗಿ ಎಸ್. ಮುರಳಿ

ವೃತ್ತಿಯಿಂದ ವಾಸಯೋಗ್ಯ ಕಟ್ಟಡಗಳ ವಿನ್ಯಾಸಗಾರ, ಸಲಹೆಗಾರ ಮತ್ತು ಕಟ್ಟಡ ಗುತ್ತಿಗೆದಾರ. ಬೆಂಗಳೂರಿನ ನಿವಾಸಿ. ಪ್ರವೃತ್ತಿಯಿಂದ ಕವಿ ಮತ್ತು ಹಾಸ್ಯ ಸಾಹಿತಿ ಹಾಗೂ ಪತ್ರಿಕಾ ವರದಿಗಾರ.ಕಾವ್ಯಶ್ರೀ, ಕಸಾಪ ದ ಪದ್ಮಾವತಿ ದತ್ತಿ ಪ್ರಶಸ್ತಿ, ಕುವೆಂಪು ಸಾಹಿತ್ಯರತ್ನ, ಹಾಸ್ಯಹನಿಕವಿ, ಕಸಾಪ ದ ಆದರ್ಶ ದಂಪತಿಗಳು........' ಸೇರಿದಂತೆ ಹಲವು ಪ್ರಶಸ್ತಿಗಳಿಗೆ ಮತ್ತು ಸನ್ಮಾನಗಳಿಗೆ ಭಾಜನ.
'ಅರ್ಧಾಂಗಿ' ಚುಟುಕು ಸಂಕಲನ, ''ಹಾಸ್ಯಾವಳಿ' ಹಾಸ್ಯಲೇಖನ ಸಂಕನಲ ಪ್ರಕಟಗೊಂಡ ಕೃತಿಗಳು. 'ಪತ್ತಂಗ್ ಪಂಚ್' ಹನಿಗವನ ಸಂಕಲನ ಸಿದ್ದತೆಯಲ್ಲಿದೆ.

ಇತ್ತೀಚಿನ ಬರಹಗಳು: ಪತ್ತಂಗಿ ಎಸ್. ಮುರಳಿ (ಎಲ್ಲವನ್ನು ಓದಿ)

• ಪತ್ತಂಗಿ ಎಸ್ ಮುರಳಿ ಆಯ್ದ ೧೦ ಚುಟುಕುಗಳು - ಸೆಪ್ಟೆಂಬರ್ 8, 2022
• ಪತ್ತಂಗಿ ಚುಟುಕು - ಜುಲೈ 4, 2021
• ಎರಡು ಚುಟುಕುಗಳು - ಮೇ 15, 2021

ಶ್ರೀ ಪತ್ತಂಗಿ ಎಸ್ ಮುರಳಿ ಅವರು ಕನ್ನಡ ಹನಿಗಾರಿಕೆಯಲ್ಲಿ ಶ್ರದ್ಧೆಯಿಂದ ಕೃಷಿ ಮಾಡುತ್ತಿರುವವರು. ಅವರೇ ಸ್ವತಃ ಆಯ್ದ ಹತ್ತು ಚುಟುಕುಗಳು ನಿಮ್ಮ ಓದಿಗಾಗಿ.

1.ಬಳಕೆ – ಪತ್ತಂಗಿ ಎಸ್. ಮುರಳಿ

ವೈದ್ಯರು
ಚೂರಿ ಹಾಕುವುದು
ಆರೋಗ್ಯದ ವೃದ್ದಿಗೆ
ಹಂತಕನು
ಚೂರಿ ಚುಚ್ಚುವುದು
ಆಯಸ್ಸಿನ ರದ್ದಿಗೆ.

2. ಕ್ರೆಡಿಟ್ಟು – ಸಮುದ್ರವಳ್ಳಿ ವಾಸು

ನನ್ನ ಕವನಗಳಂತೆಯೇ
ನನ್ನಾಕೆಗೂ ಸೇರಲಿ
ಅದರ ಕ್ರೆಡಿಟ್ಟು
ತೆಪ್ಪಗಿಲ್ಲವೇ ಪಾಪ!
ನನ್ನ ಪಾಡಿಗೆ ನನ್ನ
ಸುಮ್ಮನೆ ಬಿಟ್ಟು.

3. ಅವಮಾನ – ಬಿ. ಶೃಂಗೇಶ್ವರ

‘ಅವ’ ಹೋದಮೇಲೂ
ಮಾನ ಉಳಿದಿದ್ದರೆ
ಅದು ವ್ಯಾಕರಣ
‘ಮಾನ’ ಹೋದಮೇಲೂ
‘ಅವ’ ಉಳಿದಿದ್ದರೆ
ಅದು ರಾಜಕಾರಣ!

4. ಪರದೆ – ಕುವರ ಯಲ್ಲಪ್ಪ

ವಿಶ್ವಖ್ಯಾತ ಸಿನಿಮಾಗಳು
ತನ್ನೊಳು ಮೆರೆದಾಡಿದರೂ
ಬೀಗುವುದಿಲ್ಲ ಪರದೆ;
ನವರಸಗಳು ಹರಿದಾಡಿದರೂ
ಮತ್ತೆ ನಿಂತಿತು ಬರಿದೆ.

ಕುವರ ಯಲ್ಲಪ್ಪ

5. ಗಣಪನ ಇಲಿ: – ಡಾ. ಬೆಮೆಲ್ ಸೆಲ್ವಕುಮಾರ್

ಹಿಂದಿನ ಕಾಲದ
ಮೂಷಿಕವೂ ಸಹ
ಗಣಪನಂತೆಯೇ ಅಂತೆ
ಅತಿ ಡೊಳ್ಳು..
ಗಣಪನ ಹೊತ್ತೂ ಹೊತ್ತು
ಈಗಿವೆ ಈಗ, ಕುಳ್ಳು!

ಡಾ. ಬೆಮೆಲ್ ಸೆಲ್ವಕುಮಾರ್

6. ದೃಷ್ಟಿ: – ವಿನೋದ್ ಕುಮಾರ್ ಬಿ.

ಪುಟಾಣಿ ಫ್ರಾಕು
ಚೂಡಿ ದಾರ
ದೊಡ್ಡ ಸೀರೆ
ಎಲ್ಲವೂ ಸಹ
ಮಾಂಸದ ಮೇಲಿನ
ಹೊದಿಕೆಗಳೇ
ಅತ್ಯಾಚಾರಿಯ ಕಣ್ಣಿಗೆ.

7. ತೆರಿಗೆ : ಮಹಾಂತೇಶ್ ಮಾಗನೂರ

ಕಪ್ಪು ಹಣದಿಂದ ಕಟ್ಟುವರು
ನಮ್ಮ ನಾಯಕರು
ಒಂದರ ಮೇಲೊಂದು ಉಪ್ಪರಿಗೆ;
ಬಡಪಾಯಿ ದುಡಿಯುವ ವರ್ಗ
ಬರುವ ಬೆಳ್ಳಗಿನ ಆದಾಯಕ್ಕೆ
ಕಟ್ಟುವರು ತೆರಿಗೆ.

ಮಹಾಂತೇಶ್ ಮಾಗನೂರ

8- ಕಿತಾಪತಿಗಳು : ಕೆ. ಕೆ. ಮಾನಸ

ಮನೆಗಳ ಕಟ್ಟುತ್ತಾರೆ
ಸಾಲ ಸೋಲ ಮಾಡಿ
ಮನಗಳ ಕೆಡವುತ್ತಾರೆ
ಕಿವಿಯೂದಿ ನಾನಾ ಚಾಡಿ.

ಕೆ. ಕೆ. ಮಾನಸ

9. ನುಂಗೋದು: – ಎನ್. ಶೇಖರ್ ಬತ್ತದನದಿ

ಕಲ್ಲಿನ ಬಟ್ಟು
ತೂಕವನ್ನಷ್ಟೇ
ನುಂಗುತ್ತೆ
ಹಲ್ಲಿನ ಸೆಟ್ಟು
ವಯಸ್ಸನ್ನೂ
ನುಂಗುತ್ತೆ.

ಎನ್. ಶೇಖರ್ ಬತ್ತದನದಿ

10. ಗಳಿಕೆ – ಸಮ್ಮೋದ ವಾಡಪ್ಪಿ

ನಿನ್ನೆಯ ಲೆಕ್ಕ ಹಾಕುತ್ತಿದ್ದೆ
ಇಂದು ಕಳೆದುಹೋಗಿತ್ತು
ನಾಳೆ ಎಂಬುದನ್ನು ಕೂಡಿಸಲು
ನಾಳೆ ಇಂದಾಗಿ ಬದಲಾಗಿತ್ತು
ಲೆಕ್ಕ ನಾಳೆ ನಿನ್ನೆಯ ಮಧ್ಯೆ ತಪ್ಪಿತ್ತು
ಇಂದು ಎಂಬುದು ಶೂನ್ಯವಾಗಿತ್ತು.

ಸಮ್ಮೋದ ವಾಡಪ್ಪಿ.