ಜಿ ಎಸ್ ಎಸ್

• ಲೇಖಕರು
• ಇತ್ತೀಚಿನ ಬರಹಗಳು

ಡಾ. ಗೋವಿಂದ್ ಹೆಗಡೆ

ವೃತ್ತಿಯಲ್ಲಿ ವೈದ್ಯರಾಗಿ, ಕಾವ್ಯ,ಸಾಹಿತ್ಯಗಳಲ್ಲಿಅಪಾರ ಆಸಕ್ತಿ ಹೊಂದಿರುವ ಗೋವಿಂದ ಹೆಗಡೆ, ಕಥೆ, ಕವಿತೆ, ಅಂಕಣ ಬರಹ, ಲೇಖನ,ಅನುವಾದ ಇತ್ಯಾದಿ ಪ್ರಕಾರಗಳಲ್ಲಿ ವ್ಯವಸಾಯ ಮಾಡಿದ್ದಾರೆ. ಮೈಸೂರು ದಸರಾ ಕವಿಗೋಷ್ಠಿ, ಧಾರವಾಡ ಸಾಹಿತ್ಯ ಉತ್ಸವಗಳಲ್ಲಿತಮ್ಮ ಕವಿತೆಗಳನ್ನುಪ್ರಸ್ತುತಪಡಿಸಿದ್ದಾರೆ. ಪ್ರಾಚಾರ್ಯ ಎಚ್ಚೆಸ್ಕೆಜನ್ಮಶತಮಾನೋತ್ಸವ*'ಎಚ್ಚೆಸ್ಕೆ ಬೆಳಕು'* ಕಾರ್ಯಕ್ರಮದಲ್ಲಿ *ಕವಿಗೋಷ್ಠಿಯ ಅಧ್ಯಕ್ಷತೆ* ವಹಿಸಿದ ಗೌರವ ಇವರದು. ಕನ್ನಡ ಪುಸ್ತಕ ಪ್ರಾಧಿಕಾರದ ಯುವ ಬರಹಗಾರ ಪ್ರಶಸ್ತಿ ಪುರಸ್ಕೃತರು. 'ಕನಸು ಕೋಳಿಯ ಕತ್ತು' ಮತ್ತು 'ಪೇಟೆ ಬೀದಿಯ ತೇರು' ಎಂಬ ಎರಡು ಕವನ ಸಂಕಲನಗಳನ್ನು ಪ್ರಕಟಿಸಿದ್ದಾರೆ. ಇವರ ಬರಹಗಳು ಅನೇಕ ಪತ್ರಿಕೆಗಳಲ್ಲಿ ಹಾಗೂ ಆಕಾಶವಾಣಿ ಕೇಂದ್ರಗಳಿಂದ ಪ್ರಕಟ ಹಾಗೂ ಪ್ರಸಾರವಾಗಿವೆ.

ಇತ್ತೀಚಿನ ಬರಹಗಳು: ಡಾ. ಗೋವಿಂದ್ ಹೆಗಡೆ (ಎಲ್ಲವನ್ನು ಓದಿ)

• ಗಜಲ್ - ಫೆಬ್ರುವರಿ 27, 2024
• ಗಜಲ್ - ಜನವರಿ 19, 2023
• ಬನ್ನಿ,ಮತ್ತೆ ಬನ್ನಿ-ರೂಮಿ ಕವಿತೆಗಳು - ಸೆಪ್ಟೆಂಬರ್ 17, 2022

(ಗಜಲ್)
ಒಂದು ಸಂಜೆಯ ಹೊತ್ತು ಬೈಗಿನಲಿ ಬೆಳಗು ಕಂಡವರು
ದೀಪವಿಲ್ಲದ ದಾರಿಯಲ್ಲಿ ಪ್ರಜ್ಞೆಯ ಹಣತೆ ಹಚ್ಚಿದವರು

ತಕ್ಕಡಿಯಿಂದ ತಂಬೂರಿ ತನಕ ಇದೆ ಕಂಬನಿ ಕವಿತೆ
ಒಡೆದ ಕನ್ನಡಿಯಲ್ಲಿ ಕತ್ತಲು-ಬೆಳಕುಗಳ ಪಡಿ ಮೂಡಿಸಿದವರು

ಗೂಡಿನ ಸುತ್ತ ಆಕ್ರಮಣ ಸುಲಿಗೆ ಪ್ರೇಮದಹನ ದುರಂತ
ಹೂವುಗಳ ನಿಟ್ಟುಸಿರಿಗೆ ಅಶ್ರುಗಾನ ಹಿಡಿದವರು

ಕನಸಿನಿಂದ ನನಸಿಗೆ ಪಯಣ ಅರೆ ಮುಗಿದ ಕವನ
ನೆರಳಿಲ್ಲದ ದಾರಿಯಲ್ಲಿ ನಿಯತಿಯ ರೆಕ್ಕೆ ಅರಸಿದವರು

ಪ್ರೀತಿ ಇಲ್ಲದ ಮೇಲೆ ಏನಿದೆ, ಅಭಾವಗೀತ- ನಿಟ್ಟುಸಿರು
ಮುಗಿದ ಕತೆಯಲ್ಲೂ ಬಂತು ಬೆಳಕೆಂದವರು

ಹೊಸ ವರ್ಷದ ಕೊಡುಗೆಗೆ ದೀಪದ ಹೆಜ್ಜೆ ಹುಡುಕಿ
ಬೆಂಗಾಡಿನಲ್ಲಿ ಔತಣದ ಗಾರುಡಿ ತೋರಿದವರು

ಪಯಣದ ತುಂಬ ಶಾರದೆಯ ಆವಾಹನೆ ಕೊಳಲು ಮೋಡಿ
ಹಿನ್ನುಡಿಯಲ್ಲೂ ಬೆಳಕು ಹರಿಯಿತೆ? ಎಂದು ಕಾತರಿಸಿದವರು

ತೆರೆದ ದಾರಿಯ ಸಾಲು ಮರಗಳ ಕೆಳಗೆ ಕಂಪಿನ ಕರೆ ಕೇಳಿಸಿ
ಕಾವ್ಯೋದಯ ತಂದವರು,ಮಾಗಿ ಬೆಳಕಾದವರು

( ಇಂದು ರಾಷ್ಟ್ರಕವಿ ಜಿ ಎಸ್ ಶಿವರುದ್ರಪ್ಪ ಅವರ ಜನ್ಮದಿನ.
ಆ ಪ್ರಯುಕ್ತ ಅವರಿಗೆ ಗಜಲ್ ನಮನ.

ಈ ಗಜಲ್ ನಲ್ಲಿ ಜಿ ಎಸ್ ಎಸ್ ಅವರ ನಲವತ್ತಕ್ಕೂ ಹೆಚ್ಚು ಕವಿತೆಗಳ ಹೆಸರುಗಳನ್ನು ಸಂಯೋಜಿಸಲಾಗಿದೆ).