ಗಜ಼ಲ್

• ಲೇಖಕರು
• ಇತ್ತೀಚಿನ ಬರಹಗಳು

ಡಾ.ತನುಶ್ರೀ ಹೆಗಡೆ

ಶಿರಸಿಯಲ್ಲಿ ನೇತ್ರತಜ್ಞೆಯಾಗಿ ಕೆಲಸ ಮಾಡುತ್ತಿರುವ ಡಾ.ತನುಶ್ರೀ ಹೆಗಡೆ ತೀವ್ರವಾದ ಕಾವ್ಯ ವ್ಯಾಮೋಹಿ.
ಸಾಹಿತ್ಯ, ಕಲೆ, ರಂಗಭೂಮಿ, ಅಧ್ಯಾತ್ಮದಲ್ಲಿ ಒಲವು.
ಇತ್ತೀಚೆಗೆ ಶಿರಸಿಯ ರಂಗಾಸಕ್ತರು ಪ್ರಯೋಗಿಸಿದ, ಮಾಸ್ತಿಯವರ ಯಶೋಧರಾ ನಾಟಕದಲ್ಲಿ ಅಭಿನಯಿಸಿ, ಮೆಚ್ಚುಗೆ ಗಳಿಸಿದ್ದಾರೆ.
ಕಾವ್ಯ ಲೋಕದಲ್ಲಿ ಕೃಷಿ ಆರಂಭಿಸಿದ್ದಾರೆ.

ಇತ್ತೀಚಿನ ಬರಹಗಳು: ಡಾ.ತನುಶ್ರೀ ಹೆಗಡೆ (ಎಲ್ಲವನ್ನು ಓದಿ)

• ರೆಕ್ಕೆ ಇದ್ದರೆ ಚೆನ್ನಾಗಿತ್ತು - ಮಾರ್ಚ್ 8, 2024
• ವಾಸ್ತವ - ನವೆಂಬರ್ 1, 2022
• ಗಜ಼ಲ್ - ಸೆಪ್ಟೆಂಬರ್ 11, 2022

ಕಂಗಳು ಹೇಳುವ ಗುಟ್ಟಿಗೆ ಕಿವಿಯಾಗಬೇಕು ನಾನು
ಒಲವು ಎರೆವ ತುತ್ತಿನ ಸವಿಯಾಗಬೇಕು ನಾನು

ಗುಳಿಕೆನ್ನೆಯಲ್ಲಿ ಬಚ್ಚಿಟ್ಟಿರುವೆಯಲ್ಲ ನಸುನಗುವನ್ನು
ಆ ಕದಪುಗಳ ರಂಗೇರಿಸುವ ರವಿಯಾಗಬೇಕು ನಾನು

ಮಿಡುಕುವ ಮುಂಗುರುಳುಗಳ ಸ್ವಲ್ಪ ಸರಿಸಿಬಿಡು
ಆ ಚಂದಮನ ಸೊಬಗಲಿ ಛವಿಯಾಗಬೇಕು ನಾನು

ತೀಡಿದ ಹುಬ್ಬುಗಳಲ್ಲಿ ಬಾಣಗಳ ಹೂಡುತ್ತಿರುವೆ
ಆ ನೋಟದ ಕಚಗುಳಿಗೆ ಕವಿಯಾಗಬೇಕು ನಾನು

ನಿನ್ನ ಮನದ ಸೆಳೆಯೊ ‘ತನು’ ವ ಕೆಳೆಯೊ ಕಾಣೆ
ಈ ಚೆಲುವಿಗೆ ಪರವ ಮರೆತು ಭವಿಯಾಗಬೇಕು ನಾನು