ಸಾಹಿತ್ಯ, ಕಲೆ, ರಂಗಭೂಮಿ, ಅಧ್ಯಾತ್ಮದಲ್ಲಿ ಒಲವು.
ಇತ್ತೀಚೆಗೆ ಶಿರಸಿಯ ರಂಗಾಸಕ್ತರು ಪ್ರಯೋಗಿಸಿದ, ಮಾಸ್ತಿಯವರ ಯಶೋಧರಾ ನಾಟಕದಲ್ಲಿ ಅಭಿನಯಿಸಿ, ಮೆಚ್ಚುಗೆ ಗಳಿಸಿದ್ದಾರೆ.
ಕಾವ್ಯ ಲೋಕದಲ್ಲಿ ಕೃಷಿ ಆರಂಭಿಸಿದ್ದಾರೆ.
- ರೆಕ್ಕೆ ಇದ್ದರೆ ಚೆನ್ನಾಗಿತ್ತು - ಮಾರ್ಚ್ 8, 2024
- ವಾಸ್ತವ - ನವೆಂಬರ್ 1, 2022
- ಗಜ಼ಲ್ - ಸೆಪ್ಟೆಂಬರ್ 11, 2022
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ಉಟ್ಟ ಸೀರೆಗೆ ಇಟ್ಟ ನೆರಿಗೆಗೆ
ಉಂಟು ನಮಗೆ ಆಯ್ಕೆಯು
ನೆಟ್ಟ ಕಂಗಳು ಬಿಟ್ಟ ಟೀಕೆಯು
ಉಳಿಸಿಟ್ಟ ಅವಕಾಶವು
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ತೋಚುವ ಮಾತಿಗೆ ಆಡುವ ನುಡಿಗೆ
ಉಂಟು ನಮಗೆ ಸಮ್ಮತ
ಇದಿರಾಡದ ಸುಸಂಸ್ಕಾರವು
ಉಳಿಸಿಟ್ಟ ಅಭಿಮತ
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ಸೂಸುವ ನಗೆಗೆ ಸುರಿಸುವ ಕಂಬನಿಗೆ
ಉಂಟು ನಮಗೆ ಭಾಗ್ಯವು
ಮರೆ-ತೆರೆಯ ಅಡೆ-ತಡೆಯ ಮೈಮನಸುಗಳು
ಉಳಿಸಿಟ್ಟ ಸುಯೋಗವು
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ಮೆಚ್ಚಿದ ಹಾದಿ ಒಪ್ಪಿದ ನಡೆ
ಉಂಟು ನಮಗೆ ಪ್ರಾಪ್ತಿಗೆ
ಅಭದ್ರತೆಯ ಅವಲಂಬನೆಯ ರೇಖೆ
ಉಳಿಸಿಟ್ಟ ವ್ಯಾಪ್ತಿಗೆ
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ಕಾಣುವ ಕನಸಿಗೆ ಹಿಡಿಯುವ ನನಸಿಗೆ
ಉಂಟು ನಮಗೆ ಪರಿಸರ
ಅಸಮತೆಗಳು ವಿಷಮತೆಗಳು
ಉಳಿಸಿಟ್ಟ ವಾಸ್ತವ
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ಸ್ವಪ್ರಜ್ಞೆಗೆ ಸ್ವಚಿಂತನೆಗೆ
ಉಂಟು ನಮಗೆ ಆಸ್ಪದವು
ಅಹಮಿಕೆಯು ದಬ್ಬಾಳಿಕೆಯು
ಉಳಿಸಿಟ್ಟ ಅಸ್ಮಿತೆಯು
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ಅರಿತೆವೆಂದು ? ಕಲಿತೆವೆಂದು ?
ಹರಡಿದಷ್ಟು ರೆಕ್ಕೆ ಹಗುರ
ಬೆಳೆಸಿದಷ್ಟು ಬಲ ನಿಗುರ
ಕಳಚಿದಷ್ಟು ಬಂಧ ಸಡಿಲ
ಸವೆಸಿದಷ್ಟು ದಾರಿ ಸಲೀಲ
ಅರೆ ಸ್ವತಂತ್ರರು ನಾವು
ಅರೆ ಸ್ವಯಂಚಾಲಿತರು
ಆಗಬಹುದೇ ?
ಖರೆ ಅನಧೀನರು
ಖರೆ ಅಭಿನ್ನತೆಯರು?!
ಹೆಚ್ಚಿನ ಬರಹಗಳಿಗಾಗಿ
ಮಹಾಸಾಗರವಾದಳು
ಪುಸ್ತಕ ಪ್ರೇಮಿಯ ಸ್ವಗತ
ಪೊರೆವ ತಂದೆ