ಅಬ್ಳಿ ಹೆಗಡೆ ಲೇಖನಾಮದ ಸುಬ್ರಹ್ಮಣ್ಯ ಹೆಗಡೆ,ಉತ್ತರಕನ್ನಡ ಜಿಲ್ಲೆಯಹೊನ್ನಾವರದವರು. ವೃತ್ತಿಯಲ್ಲಿ ಅಡಿಕೆ ಕೃಷಿ, ಪ್ರವೃತ್ತಿಯಲ್ಲಿ ಸಾಹಿತ್ಯದ ಓದು,ಬರಹ.. ಇವರ ಎರಡು ಕಿರು ಕಾದಂಬರಿಗಳು ಪ್ರಕಟಣೆಯ ಹಂತದಲ್ಲಿವೆ. ಕವಿತೆ ಇವರ ಅಚ್ಚುಮೆಚ್ಚಿನ ಸಾಹಿತ್ಯ ಪ್ರಕಾರ. ಅನೇಕ ಕವನಗಳು ಅಂತರ್ಜಾಲ ಪತ್ರಿಕೆಗಳಲ್ಲಿ ಪ್ರಕಟವಾಗಿವೆ.
ಇತ್ತೀಚಿನ ಬರಹಗಳು: ಅಬ್ಳಿ ಹೆಗಡೆ (ಎಲ್ಲವನ್ನು ಓದಿ)
- ನನ್ನ ಈ…ಮನೆ - ಜುಲೈ 25, 2022
- ಬದುಕ ಮಧ್ಯ - ಆಗಸ್ಟ್ 22, 2021
- ಒಂದು ಸ್ವಗತ - ಜೂನ್ 30, 2021
ಇಂದು-ನಿನ್ನೆ
ನಿತ್ಯ ಕೃತ್ರಿಮದಾಟ
ಸಹಜತೆಯು ಸೊನ್ನೆ.
ನೆನಪೇ ಸಂಜೀವಿನಿಯು
ನೆಮ್ಮದಿಯ ನಿನ್ನೆ.
*******
ನನ್ನಿಷ್ಟ
ನನ್ನಿಷ್ಟ ನನಗಷ್ಟೇ
ಬೇಡ ತಕರಾರು.
ನಾ ರಾಜ ನನ್ನೊಳಗೆ
ನಂದೇ ದರ್ಬಾರು
*******
ಅಭೇದ್ಯ
‘ಪುಗಸಟ್ಟೆ’ ದೊರೆಯುವುದು
ನಿತ್ಯ ಉಪದೇಶ.
ಬದುಕ ರಂಗಸ್ಥಳದಿ
ವಿಧ,ವಿಧದ ವೇಷ.
ತೊಡಿಸಿ ಕುಣಿಸುವರಾಗ
ನೋಡಲಿಕೆ ಚೋದ್ಯ.
ನಮ್ಮರಿವು ನಮಗಿರಲು
ನಾವು ಅಭೇದ್ಯ
*******
ಇಷ್ಟ,ಕಷ್ಟ
ಬಾನ ಅಟ್ಟದ ಮೇಲೆ
ನೀರಿನಾ ಮಡಕೆ.
ತೂತು ಮಾಡಿದವರ‍್ಯಾರು
ಆ…ಮಡಕೆ ತಳಕೆ?
ಮುಗಿಲ ಹರ್ಷದ ವರ್ಷ
ಕಾದ ನೆಲದಿಷ್ಟ.
ಇತಿ,ಮಿತಿಯ ಮೀರಿದರೆ
ಇಷ್ಟವೂ ಕಷ್ಟ.
*******
ಕವಿತೆಗೆ…
ರಾತ್ರಿ ಕತ್ತಲೆಯಲ್ಲಿ
ಸುರಿವ ಮಳೆಯಂತೆ
ನೆನೆಯದಿದ್ದರೆ ಅದುವೇ
ಬರಿ ಶಬ್ದ ಸಂತೆ.
ಸಖೀ ನೀ ನನ್ನಲ್ಲಿ
ಎಂದೂ ಜೀವಂತ
ಆದರೂ ಆಗದಿಹೆ
ನೀ..ನನ್ನ ಸ್ವಂತ.
*******
ಹೆಚ್ಚಿನ ಬರಹಗಳಿಗಾಗಿ
ಪತ್ತಂಗಿ ಎಸ್ ಮುರಳಿ ಆಯ್ದ ೧೦ ಚುಟುಕುಗಳು
ಪ್ರೀತಿ
ಬಾ ವರ್ಷಧಾರೆ…