ರಮ್ಯ- ಬಿಂದು

• ಲೇಖಕರು
• ಇತ್ತೀಚಿನ ಬರಹಗಳು

ರಮ್ಯಾ ವಿನಯ್

ಶಿರಸಿಯ ಮೂಲದ ರಮ್ಯಾ ಈಗ ಉಡುಪಿಯ ನಿವಾಸಿ.

ಓದಿದ್ದು ಎಮ್ ಎ ಸಮಾಜ ಶಾಸ್ತ್ರ.
ಫ್ಯಾಶನ್ ಡಿಸೈನಿಂಗ್ ಅಲ್ಲಿ ಆಸಕ್ತಿ ಇದ್ದಿದ್ದರಿಂದ, ಮದುವೆಯ ನಂತರ ಕಲಿತು, ವಿರಾಮದ ವೇಳೆಯಲ್ಲಿ ಎಂಬ್ರಾಯ್ಡರಿ ಕೆಲಸವನ್ನು ಮಾಡುವುದು ಇವರ ಹವ್ಯಾಸ​. ಸಂಗೀತದಲ್ಲಿ ತುಂಬಾ ಆಸಕ್ತಿ ಇರುವುದರಿಂದ ಹಿಂದೂಸ್ತಾನಿ ಸಂಗೀತವನ್ನು ಕಲಿಯುತ್ತಿದ್ದಾರೆ. ಹನಿಗವನ, ಕವಿತೆಗಳನ್ನು ಬರೆಯುತ್ತಾರೆ.

ಇತ್ತೀಚಿನ ಬರಹಗಳು: ರಮ್ಯಾ ವಿನಯ್ (ಎಲ್ಲವನ್ನು ಓದಿ)

• (ಹುಸಿ)ನಿರೀಕ್ಷೆ - ಜನವರಿ 22, 2022
• ಇನ್ನೇನು ಬೇಕಿದೆ…? - ಏಪ್ರಿಲ್ 6, 2021
• ರಮ್ಯ- ಬಿಂದು - ಜನವರಿ 21, 2021

ನೀನೇರಿದ ಎತ್ತರವನ್ನು
ತಲುಪಬಹುದಿತ್ತೇನೋ
ನಾನಿನ್ನೂ
ಮೆಟ್ಟಿಲುಗಳನ್ನು ಎಣಿಸುತ್ತ
ಕಳೆದುಹೋಗಿದ್ದೇನೆ

*****

ಹಳೆಯ ಸಾಲುಗಳನ್ನಾದರೂ
ನೆನಪಿಸಿಕೋ ಮತ್ತೊಮ್ಮೆ
ತೇಲಬೇಕಿದೆ ನೆನಪಿನಲೆಯಲ್ಲಿ
ಮರೆತೆಲ್ಲ ದುಗುಡ

*****

ಕುದಿಯುತ್ತಿದ್ದ ಚಹಾದೊಂದಿಗೆ
ಮಿಳಿತವಾಗಿದ್ದವೆಷ್ಟೋ ಭಾವಗಳು
ಉಕ್ಕಿದಾಗಲೇ ಅರಿವಾದದ್ದು
ತಾಪವು ಹದ ತಪ್ಪಿತ್ತೆಂದು

*****

ಕರಗುವುದರ ಅರಿವಿದ್ದರೂ
ದೀಪ ಉರಿಯುತ್ತಲೇ ಇತ್ತು
ಬಹುಶಃ ಅದೂ
ಪ್ರೇಮಿಯಾಗಿರಬೇಕು…

*****

ಕತ್ತಲೆಯ ಮುಸುಕನ್ನು
ಸರಿಸದಿರು ಗೆಳೆಯಾ
ಮುಚ್ಚದ ಕಣ್ಣುಗಳು
ಕೆಂಪಾದ ಕೆನ್ನೆ ಕಂಡೀತು

*****

ಸುಗಮವಲ್ಲವೀ ಪಯಣ
ಸಾಗಿಹೆ ಕೊನೆಯರಿಯದ
ದಾರಿಗೆ
ಕಮರಿಹೋಗಿದೆ ಕನಸು
ದೂರು ಹೇಳಲಿ ಯಾರಿಗೆ

*****

ಎಂದೂ ಕಾಣದ ಕನಸೊಂದು
ರೆಪ್ಪೆ ಮೇಲೆ ಕೂತಿದೆ
ಮನದಲೀಗ ಬೆಳಗಿವೆ
ಸಾಲು ಹಣತೆ

*****