ನಿಬ್ಬು ಮುರಿದು ಹಾರಿತು

• ಲೇಖಕರು
• ಇತ್ತೀಚಿನ ಬರಹಗಳು

ಬೆಂಶ್ರೀ ರವೀಂದ್ರ

ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಇದ್ದುಕೊಂಡು ಕನ್ನಡದ ಸೇವೆ ಮಾಡುತ್ತಿರುವ ಬೆಂಶ್ರೀ ರವೀಂದ್ರ ಅವರು ಸಾಹಿತ್ಯ ಸಂಘಟಕರಾಗಿ ಅನೇಕ ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟಿದ್ದಾರೆ. ರವೀಂದ್ರ ಅವರು ಸ್ವತ: ಕವಿ ಹಾಗೂ ಬರಹಗಾರ.

ಇತ್ತೀಚಿನ ಬರಹಗಳು: ಬೆಂಶ್ರೀ ರವೀಂದ್ರ (ಎಲ್ಲವನ್ನು ಓದಿ)

• ಸಮಾಧಿ ಸಡಗರ - ಜನವರಿ 22, 2022
• ನಿಬ್ಬು ಮುರಿದು ಹಾರಿತು - ಸೆಪ್ಟೆಂಬರ್ 25, 2021
• ಮತ್ತೆ ಬಂತು ಆಷಾಢ - ಜುಲೈ 21, 2021

ಕಾಗೆಯೊಂದು ಹಾರಿ ಬಂದು
ಪೆನ್ನಿನಲ್ಲಿ ಸೇರಿಕೊಂಡು
ನಿಬ್ಬಿನಿಂದಾಚೆಗೆ ಕೊಕ್ಕು ಚಾಚಿತು

ತನ್ನ ಕಥೆಯ ಬರೆಯಿರೆಂದು
ಸಾಹಿತಿಯನು ಕೇಳಿಕೊಂಡು
ಜಗಕೆ ನಗುವ ತಾ ಎಂದಿತು

ಬರಹಗಾರನಕ್ಷರ ಮರುಗಿ
ನಗೆಯ ಮರೆತು ಜಗವು ಸೊರಗಿ
ಉಬ್ಬುಸವೀಲೋಕವೆಂದನು

ಚಿಂತಿಸಿದರು ಕವಿಯೆ ನೀನು
ನನ್ನ ಪಾಡು ಕೊಂಚ ನೋಡು
ನೋವಿನಲ್ಲೂ ನಗೆಯು ಇರುವುದು

ಜಗದ ಜನರು ನನ್ನ ಕಂಡು
ತಮಗೆ ತೋಚಿದಂತೆ ಆಡಿ
ಕಾಕಪಕ್ಷಿಯೆಂದೆನ್ನ ಅಲ್ಲಗೆಳೆವರು

ಒಮ್ಮೆ ಅವರ ಪಿತೃವೆಂದು
ಮತ್ತೊಮ್ಮೆ ಕೆಟ್ಟ ಶಕುನವೆಂದು
ದಡ್ಡಕಾಗೆ ಹಾಗೆಹೀಗೇನುವರು

ಮನುಜಗಿಂತ ಸ್ವಲ್ಪ ಕಮ್ಮಿ
ಜಾಣಹಕ್ಕಿ ನಾಡಪಕ್ಷಿ ಮಾಡಿರೆಂದು
ಹಾರ್ಕೆ*ಯಿಲ್ದೆ ಆರ್ಕೆ* ನುಡಿವರು

ಹಸಿವಾದರೆ ಹುಡುಕಿ ಬರುವೆ
ಬಂಧುಗಳ ಕೂಗಿ ಕರೆವೆ
ನನ್ನಪಾಡಿಗೆ ನಾನು ಇರುವೆ

ಪ್ರಕೃತಿ ಬಿಡಿಸಿದ ಚಿತ್ರದಂತೆ
ಇರುವ ನನ್ನ ಗೂಡು ಕೆಡವಿ
ಕಾಣೆಯಾದೆನೆಂದು ನುಡಿವರು

ಯಾರು ಏನೇ ಅಂದ್ರು ನಾನು
ಸಂತಸದಿ ಬದುಕುವೆ ಜಗದಿ
ನಿತ್ಯದೂಟಕಾಗಿ ತಿಣುಕುತ

ನಿಬ್ಬಿನಿಂದ ಹೊರಗೆ ಹೋಗುವೆ
ಮಬ್ಬಿನಲ್ಲಿ ನೀನು ಇರುವೆ
ಡಬ್ಬಿಯಲಿ ನಗುವ ಇಡುವೆ

‘ತೆಗೆದುಕೋ’ ಎಂದು ಹಾರಿತು
ಗಗನವೆ ತಾನಾಗಿ ಮೆರೆಯಿತು
ಪೆನ್ನು ನಿಬ್ಬು‌ ಮುರಿದು ಬಿದ್ದಿತು.

*ಹಾರ್ಕೆ= ಹಾರಿಕೆ

**ಆರ್ಕೆ= ಆರ್‌ಕೆ ಲಕ್ಷ್ಮಣ್