ಗಝಲ್…

• ಲೇಖಕರು
• ಇತ್ತೀಚಿನ ಬರಹಗಳು

ಜಬೀವುಲ್ಲಾ ಎಂ. ಅಸದ್

ಆರೋಗ್ಯ ಕ್ಷೇತ್ರದಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಜಬಿ ಅವರಿಗೆ ಕಲೆ ಮತ್ತು ಸಾಹಿತ್ಯದಲ್ಲಿ ಅಪಾರ ಆಸಕ್ತಿ. ಇವರ ಕವಿತೆ,ಗಜ಼ಲ್ ಮತ್ತು ಭಾವಕ್ಕೆ ತಕ್ಕಂತೆ ಬಿಡಿಸುವ ಕಲಾಕೃತಿ ಬೆರಗುಗೊಳಿಸಬಲ್ಲುದು. ಇತ್ತೀಚೆಗೆ ಇವರ ಆಕಾಶವಾಣಿ ಸಂದರ್ಶನವೂ ಪ್ರಕಟವಾಗಿದೆ.
ಪ್ರಕಟಿತ ಕೃತಿ: ಏಕಾಂಗಿಯ ಕನವರಿಕೆಗಳು(ಕವನ ಸಂಕಲನ)

ಇತ್ತೀಚಿನ ಬರಹಗಳು: ಜಬೀವುಲ್ಲಾ ಎಂ. ಅಸದ್ (ಎಲ್ಲವನ್ನು ಓದಿ)

• ಮೈಖೇಲ್ ಜಾಕ್ಸನ್ ಎಂಬ ಲೋಕ ಕಂಡ ಮಾಂತ್ರಿಕ - ಡಿಸಂಬರ್ 21, 2021
• ಪ್ರೀತಿ ಹಂಚುತ ಸಾಗು - ನವೆಂಬರ್ 24, 2021
• ನನ್ನ ಕವಿತೆಗಳಿಗೊಂದಷ್ಟು ಜಾಗ ನೀಡಿ - ನವೆಂಬರ್ 3, 2021

ಲತೆಯ ಮನ ಮಿಡಿದು ಸುಮ ಅರಳಿ ನಕ್ಕಿದಂತೆ
ಹೃದಯಕೆ ಮುಳ್ಳು ತಾಗಿ ನೆತ್ತರ ಗೀತೆ ಒಸರಿದಂತೆ

ಜಾರುತಿದೆ ನೆನಪು ಜೋಗದ ವೇಗ ಪಡೆದು ಹೀಗೆ
ಮಾತಿಲ್ಲದ ದಾರಿಯಲ್ಲಿ ಮೌನದ ಮಳೆ ಸುರಿದಂತೆ

ಕಾಡಿದೆ ಪ್ರೇಮದ ಅಲೆ ದೂರಾದರೂ ಬಿಡದು ಏಕೆ
ಕನಸಕಡಲಲಿ ರಂಗೇರಿ ನಕ್ಷತ್ರಮೀನು ಮೀನುಗಿದಂತೆ

ಗಿರಗಿರ ಮಾರುತ ಗಿರಿಯ ಶಿಖರ ಚುಂಬಿಸಿ ಸ್ಖಲಿಸಿದೆ
ನಗಾರಿ ಸದ್ದಿಗೆ ಶಿಲೆಯೊಂದು ಕರಗಿ ಶಿಲ್ಪವಾದಂತೆ

ನಾದದ ಅಲೆ ಮದಿರೆಯ ನಶೆಯಾಗಿ ಆವರಿಸಿದೆ
ನವಿರಾದ ಸ್ಪರ್ಶದಿ ನಯನಗಳು ನುಡಿ ಚೆಲ್ಲಿದಂತೆ

ಸಾಲದ ಸಂತಸ ನೀರ ಮೇಲಣ ತೇಲುವ ಶವ ಒಂದೇ
ನಿತ್ಯ ನೇಸರನ ಬುತ್ತಿಯಲ್ಲಿ ಚಂದಿರನು ಹೊಳೆದಂತೆ

ದೇಗುಲದ ಏಕಾಂತದಿ ದೀಪ ಬೆಳಗಬೇಕು ಖುಷಿಯಲಿ
ಊರಹೊರಗಿನ ಕೆರೆಯಲಿ ಕಮಲದಾವರೆ ಅರಳಿದಂತೆ

ಬಯಕೆಯ ಬೇರು ಬಯಲ ಆವರಿಸಿ ಬೀಗಿದೆ ಕಾಣು
ತೆರೆದ ಬಾಗಿಲು ಬಾರದ ಅವಳಿಗಾಗಿ ಕಾಯುವಂತೆ

ಎಷ್ಟು ನರಳಿದರೂ ಕಡಿಮೆಯಾಗದು ಕಾಣದ ನೋವು
ತಾರಸಿ ಮೇಲಿನ ಹಸಿ ಅರಿವೆಗಳು ಕಂಬನಿ ಕೆಡವಿದಂತೆ

ಇರುಳ ಪೂರ ನಿನ್ನದೆ ಧ್ಯಾನ ಎಲ್ಲಿಗೆ ಹೊರಟು ಹೋದೆ
ಕಾಲ ದಾಟುತ್ತಿದೆ ದಿನಗಳನ್ನು ಯಾರಿಗೂ ಕಾಣದಂತೆ

ಭವದ ಅನುಭವ ಭಾವಬಂಧನದ ಮೇಳ ಅಸದ್
ತಳ ಕುಸಿದ ಗಡಿಗೆಯ ಹೊತ್ತು ಖಾಲಿಯಾಗಿ ನಡೆದಂತೆ