ಹಿಂಗಾಲದ ಸೂರು, ಸಾವಿರ ಸೋರು

• ಲೇಖಕರು
• ಇತ್ತೀಚಿನ ಬರಹಗಳು

ಬೆಂಶ್ರೀ ರವೀಂದ್ರ

ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಇದ್ದುಕೊಂಡು ಕನ್ನಡದ ಸೇವೆ ಮಾಡುತ್ತಿರುವ ಬೆಂಶ್ರೀ ರವೀಂದ್ರ ಅವರು ಸಾಹಿತ್ಯ ಸಂಘಟಕರಾಗಿ ಅನೇಕ ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟಿದ್ದಾರೆ. ರವೀಂದ್ರ ಅವರು ಸ್ವತ: ಕವಿ ಹಾಗೂ ಬರಹಗಾರ.

ಇತ್ತೀಚಿನ ಬರಹಗಳು: ಬೆಂಶ್ರೀ ರವೀಂದ್ರ (ಎಲ್ಲವನ್ನು ಓದಿ)

• ಸಮಾಧಿ ಸಡಗರ - ಜನವರಿ 22, 2022
• ನಿಬ್ಬು ಮುರಿದು ಹಾರಿತು - ಸೆಪ್ಟೆಂಬರ್ 25, 2021
• ಮತ್ತೆ ಬಂತು ಆಷಾಢ - ಜುಲೈ 21, 2021

ಬದುಕು ಕಡಲಿಂಗೆ ಉಸಿರ ಬಿಸಿಯೊತ್ತಿ
ಆವಿಯಾಗಿವೆ ನೆನಪು ಪುಂಖಾನುಪುಂಖ
ಸೂರ್ಯನುರಿ ಧಗೆಗೆ ಬಿರ್ರನೆ  ಮೇಲೆದ್ದು
ಕೂಡಿ ತಂಪಾಗಿವೆ ತೂಗಿ ಕರಿಮಡುವನು 

ಬುವಿಯನಪ್ಪಿ  ಬಾನ ಮರೆಮಾಡಿ ನೆನಪು
ದಭದಭಿಸಿ ತೂತು ಮಾಡಿದೆ ಮುರಿದು
ಹಿಂಗಾಲದ ಛತ್ರಿ ಸಾವಿರ ಸೋರು ಚೂರು
ಬಾನ್ಕಡಲ ಸೂರ್ಚಂಡು, ಬಾಸುಂಡೆ ಮೈಯಿ

ನೆನಪು ಮನದ ಬಾವು ಅದಕ್ಕೆಲ್ಲಡೆ ತಾವು
ಸುತ್ತುತ್ತ ಮೇಲೆ‌ ಕೆಳಗೆ ಅಲ್ಲಲ್ಲೆ ಠಳಾಯಿಸಿ
ಹರಿದಿತ್ತು ಬಾಳ ಚಾಪೆ ಹಳೆಹುಲ್ಲ ಎಸಳು
ಹೊಂದುವುದೆ ಹುಡುಗ ಹೆಣಿಗೆ ಚಕಮಕಿಗೆ

ಕಲ್ಪನೆಯ ಟಗರುಗಳು ಹೂಂಕರಿಸಿ ನುಗ್ಗಿ ತಲೆ
ತಲೆಢಕ್ಕಾಢಿಕ್ಕಿ ಒಡೆಯುವುದೆ ಕಟ್ಟಿಟ್ಟ ಬುತ್ತಿ
ಭಾವದೇಣಿಯ ನೂಲು ಎರೆಮಣ್ಣ  ಪಾಲು
ಭೂಮ್ಯಾಕಾಶದಲಿ ಜೋತಾಡುತ್ತಾ  ತ್ರಿಶಂಕು

ಹೋಗೆಂದರೆ ಹೋಗಲಾರೆನೆನುವ  ಒಮ್ಮೆ 
ಕಳವಳ ಕಾವಳದ ಕಾಜಾಣವಾಗಿ ಮತ್ತೊಮ್ಮೆ
ಮನದಿಂಪಿಗೆ ಪರಪುಟ್ಟನುಲಿಯಾಗುವ ನೆನಪೆ
ಇದ್ದುಬಿಡು ಕನಲದೆ ಒಲಿದು ಒಡನಾಡಿಯಾಗಿ

ಆಗ ನನಗೂ ನಿನಗೂ ಇಬ್ಬರಿಗೂ ಆರಾಮು